克叔強硬救“車”
正所謂新官上任三把火,車仔新任教頭軒迪克已正式接手球隊,並完成上場後第一課操練。首戰對屈福特前,“克叔”接受記者訪問,講到明邊個球員“hea”踢,又或者搞搞震,想分化球隊的話,克叔絕對唔會姑息,話知你係幾好波嘅超級球星,一於殺無赦。
老摩因班球員“玩嘢”被迫走,盲嘅都知,克叔又點會傻吓傻吓?既然油王搵得克叔“返頭嫁”,又只係教半季,克叔肯定大權在握,絕對唔會揸住雞毛當令箭。表明做得呢份工,就會全力以赴。正如指責班“車手”一樣,收得咁高人工就要交出功課,總之邊個球員再搞小動作,冇鬥心,欠缺比賽態度的話,一定冇得留低。
克叔一向以強硬見稱,打擊球隊中嘅壞分子絕不手軟。之前邊幾個係滋事分子,克叔亦心中有數,已被列為黑名單,但當然唔會點名抨擊。希望幾個“蛇頭”自動自覺安守本份,千祈唔好令克叔發火,否則非同小可。到底車仔下半季能否重新上路?車迷就要拭目以待。
Ben
足球評述員
留言