《歌手4》音響出錯要重唱
祖兒首戰贏季軍
容祖兒第一次參加湖南衛視歌唱節目《我是歌手4》節目,首度出賽就得到第三名。日前飛到長沙與克勤繼續錄影節目的祖兒,透過長途電話表示:“嘩,簽了保密協議的,你們星期五(昨晚)睇結果啦,我唔可以講。”
祖兒第一次參賽,選唱李克勤的《月半小夜曲》。但現場音響出現意外,祖兒唱到一半,咪高峰突然冇聲,不過她依然處變不驚,努力唱下去,結果令現場觀眾非常欣賞她的投入,拍爛手掌。大會在搞掂音響問題後,最後決定讓祖兒重唱一次,結果她得到季軍。身為主持人的李克勤,在祖兒得到季軍之後,恭喜好朋友之餘,更笑言:“女人真的靠唔住,唱了我的歌,又贏了我。哈哈。”
做了十多年歌手,但未曾參加過比賽的祖兒,坦言今次出賽壓力非同小可:“真係唔知點解緊張得咁緊要,可能係因為知道這是十幾億人看的節目,不可以出錯。剛完成美國巡演,未睡過覺就飛過去比賽,無論體力、心態都未準備夠好。唱《月半小夜曲》又係臨時決定,唱唱下個咪又冇聲,當時我真係嚇到鼻哥窿都冇肉,個心有如坐跳樓機,仲驚過睇鬼片。當時心諗,既然係比賽,冇聲都要唱完佢!唱完啦,以為鬆口氣,點知大會突然又話畀機會讓我再唱多次,係咪同跳樓機一樣,上上落落上上落落,咁大個女未試過咁驚!”
問到她得到季軍成績是否滿意?祖兒說:“真係仲未唔講得成績,大家到時上網睇啦。不過我好多謝克勤,佢係盲公竹,幫了我很多。”
克勤則表示:“因為係我最好的朋友,所以我才會把最好的歌讓給她去參賽唱。朋友得到好成績,如自己得到好成績一樣開心。我唔會覺得比賽會影響友誼,比賽要落力,但最後都係友誼第一。我最希望我兩個都可以殺到最後,入到總決賽囉。結果係點都唔係我們可以控制,最緊要過程開心咪得囉。”
留言