愛奴搶分冇得“簡”

媒體

分類

新聞

西甲明晨有場搶分大戰，由愛斯賓奴對華歷簡奴，兩隊目前都在護級邊緣掙扎，邊隊輸波會更深陷險境，雙方在首循環殺得相當激烈，共出現七黃兩紅，今仗再度碰頭，唔係你死就係我亡。

愛斯賓奴近幾場表現較佳，近三戰取得六分，惜上場貪勝不知輸，竟三球慘敗在畢迪斯腳下。輸波原因皆因多名主力患上腸胃炎，導致人腳陣容不整。今場有多名大將復出，整體戰力得到提升，呢三分非取不可。

愛斯賓奴中前場實力其實唔差，阿辛斯奧、迪奧普、摩蘭奴、V山齊士及貝古爾等都係身經百戰踢得之人，前線具有一定入球能力，對住同級波嘅華歷簡奴，料必狂攻對手。

華歷簡奴目前只得廿六分，只係靠得失球差壓到格蘭納達排尾四，護級形勢相當不利。球隊防守能力相當差，廿七場聯賽共失五十八球，是西甲中失球最多一隊，且十三場作客只得一勝五和七負，作客表現認真靠唔住。初盤愛斯賓奴讓半球，捧愛斯賓奴主場必斬華歷簡奴，一報首循環一敗之仇。

推介：愛斯賓奴2:0

Ben

足球評述員