友賽表現信唔過
歐洲國家盃仲有七十幾日就正式在法國開戰,列強開始厲兵秣馬。上星期的國際比賽日,幾支爭標熱門都有亮相,可能屬友賽性質,所以多支傳統勁旅根本未見真章。
世界盃冠軍德國在自己地頭,又在兩球領先下竟被英格蘭反勝?難怪好多波友都問阿Ben係咪“假打”。呢個問題真係答你唔到。另一大熱的西班牙賽和意大利,跟住再悶和二線嘅羅馬尼亞,戰果當然令“紅牛”迷失望。正如阿Ben所料,寓賽於操,成班頂級球星未到埋牙又點會為國捐軀同你搏命?
有天王坐鎮嘅葡萄牙仲過癮,在主場輸埋畀保加利亞,所以話呢類型嘅國際友誼賽,各位波友千祈唔好太認真。
如果要講認真,就一定揀英格蘭。因為英軍球員一向比賽態度及場上積極性都係值得敬佩,就算國內聯賽,即使低幾班嘅球隊,對住英超最勁嘅大球會,無論輸到幾球都好,都會戰鬥到底拼足九十分鐘。英國波咁吸引就係呢個原因。講到踢大賽嘅奸狡程度,英軍又點同德國比,去到歐國盃決賽周一定有料到。
足球評述員 Ben
留言