說說“板眼”

    “板眼” ，有歌者談及，這是一種怎樣的曲譜、唱法？

    它是屬於粵曲唱腔中的歌謠體，其中還包括南音、龍舟、木魚、粵謳、鹹水歌等等，是珠江三角洲一帶的民間曲藝形式，與粵曲唱腔的梆黃、念白、牌子互為補充、融為一體成為極富南粵風情的粵曲。

    “板眼”的唱法輕鬆活潑、幽默風趣，旋律比較簡單而有跳躍感，在丑生彩旦的行當中經常使用。“板眼”分上下句，上句結束音為“1”，下句可分陰平（結束音為“3”，或陽平（結束音為“6”）。“板眼”的起唱，以一槌鑼鼓，奏“工士工”（3  3）便唱了，唱來只有一個速度，盡量突出“士工”（  3）音。

    手頭有資料，是朱老丁舊曲《神秘之夜叫艇》，曲詞是：“呢單嘢，鬼（咁）聲嬌幾乎攞我命一條，（睇佢）坐喺（個）船頭嚟賣俏，有人行過（佢就）嘴刁刁……。”

    一般的“板眼”唱段不長，但手頭有一段名《第一關》的較少見的長篇，記錄下來，以供參考。曲意是日軍侵華，廣州某些富裕人家猶醉生夢死的生活縮影：咪提就罷，提起就嬲，如今不必講起嗰個關頭，有偈你哋閒人就傾到夠，咪講話關心吓時事就講吓派頭。大好嘅楡關都會失守，容乜易啲矮仔（指日軍）好快就打到廣州，嗰個大快活話，而家佢啲日本戰艦雖則泊晒係嗰個西河口，你慌佢敢開炮呀不過係抛吓浪頭。咁就各人有路就各自走，隔籬葉大少，托番佢籠雀仔又去上高樓，對面二少奶，叫齊黃地二太、陳地三小姐等等又嚟開檔打天九囉。今日二太牌運唔多夠，大少奶贏咗就爛滋油，佢話食咗飯至走啦，今晩加菜滑雞球，我哋少爺今早買咗幾斤靚土魷呀（註：那時土魷已是“席上珍”），今晩得閒我請睇千里駒“蕩舟”（註：千里駒是著名男花旦，“蕩舟”是劇目），二太話“飽死荷蘭豆”咯，重飽死韮菜頭，你啲魷魚係充頭貨，因為你少爺係去做老丘（註：當兵），有你去查人又話抗某某（註：不便明言），乜嘢叫做堅持到底，你哋總唔吼。嗰啲機關緝私船，慌死唔夠，軍艦保護，輸運自由。

    二少奶開言，就擘開笑口，佢話“抵制”兩字，你都唔識得解究？抵就抵食制就過制，由你唔嬲，三兩毫子一碼靚花布（指日本貨），着起上嚟，仲靚過絲綢。亡國嗰陣時係大位事，我哋家肥屋潤又駛乜憂……（就撮記到此了）。

    楚    竹