利雲特有“希”望
西甲今輪除有國家打吡大戰外,明晨亦有一場護級生死戰,兩支墊底球隊利雲特與希杭埋身肉搏。此戰唔係你死就係我亡,尤其包尾嘅利雲特,再輸的話應該可以轉入深切治療部,等“收工”。
利雲特今仗主場一定全面搏殺,三分必取不可。近六個主場取得四勝兩負,只輸畀巴塞與皇馬兩大豪門,根本非戰之罪,其餘四場攞足十二分,足以證明球隊護級決心。
冬季轉會市場重開,利雲特展開救亡行動,借用意大利一級射手G羅斯,拍住巴西前鋒迪華臣,前線火力大增,近八場比賽兩大攻擊手幾乎包辦所有入球。仲有祖安華度、麥贊尼及奧班等有份量球員加盟後,戰績明顯提升,主場對住實力平庸嘅希杭,利雲特贏波在望。
希杭上場爆大冷主場反勝馬體會,搶得吊命三分,但球隊依然深陷險境,一樣要垂死掙扎。不過,希杭首循環主場曾經三球大敗在利雲特腳下,對上一次作客利雲特又慘吞四蛋,受讓嘅希杭又點捧得落手。初盤利雲特讓半球,捧利雲特起“杭”。推介:利雲特二比〇
足球評述員 Ben
留言