車仔唔怕“熱”
執筆之時,仲未知曼聯與李斯特城戰況如何,但誰勝誰負,相信對明晨場倫敦打吡影響不大。
倫敦打吡戰一向都相當激烈,點都唔衰得,尤其車路士,一向在倫敦認咗第二,都冇邊隊敢認第一,但今季已經衰到冇晒“面子”,今戰點都要爭返啖氣,如果畀同市球隊攞英超冠軍,就等於踩自己一腳,又點會賣個人情畀對手。
無論如何熱刺都一定搏埋最後三場波,只要過到車仔呢一關,餘下主場對修咸頓及作客尾二嘅紐卡素都有一定贏面,坐亞望冠應該冇走雞。只不過,十幾年來作客史丹福橋球場都未贏過的熱刺,全取三分信心實在有限。初盤平手,捧車仔一球小勝格。
車仔上場大勝般尼茅夫,費比加斯、夏薩特、迪亞高哥斯達、柏度及艾雲奴域等一眾主力踢足全場,表現亦交足功課,證明球隊依然認真作戰。主帥“克叔”當然希望好頭好尾,今仗冇得“揸流攤”。熱刺都算黑仔,上場被西布朗逼和,唔見關鍵兩分成為最大致命傷。唯有餘下三場全勝,仲要李斯特城三場不能贏,熱刺才有機會。三場賽事期間,乜嘢事都有可能發生,但最緊要今場殺“車”先講。
推介:車路士1:0
足球評述員 Ben
留言