前晚旺紅?
英格蘭今季所有賽事經已完結,紅魔鬼曼聯執返個尾彩,驚濤駭浪下攞返個足總盃,主帥雲戈爾總算有個交代,但講真一句,有睇波嘅波迷應該認同,曼聯呢個盃可以話叫做執返嚟,整場比賽霸氣不足,完全有失強隊風範,要踢到加時階段只得一次正式射門才能搞掂水晶宮,“雲帥”應該要答謝神恩。
不過,雲戈爾能否保得住個“帥印”仍未知數,據“街邊社”消息,曼聯下季將會由雲戈爾與摩連奴雙劍合璧,聯手接管球隊,不過個人認為可信程度有限,所謂一山不能藏二虎,何況“老摩”性格,又點會受制於人?
講返足總盃場波,曼聯能夠逆轉贏波真係大話夾好彩,總括嚟講,水晶宮整體表現實在唔差,只係未能把握領先優勢,可以賴輸在大賽經驗。
睇完足總盃跟住睇埋德國盃決戰,拜仁對多蒙特,睇到加時仲要射埋十二碼,仲見到“哥帥”喊住說goodbye,因為帶領球隊今季成為雙冠王,對拜仁球迷都留下一個美好回憶。
信不信由你!睇返“通勝”,原來舊曆十六旺紅,難怪兩支紅衣球隊都能夠驚險捧盃(AC米蘭除外)。
Ben
足球評述員
留言