勵馳圍雀爭勝收官
【本報消息】澳門甲組足球聯賽今周煞科,今晚七時半在澳門運動場率先由兩支本地班勵馳與雀聯打頭陣。兩隊排名早已定斷,今仗已成例行公事。人腳佔優的勵馳,有望繼首循環後再次擊敗對手,以勝利為今季收官。
賓菲加提早封王,雀聯提早降班,但次席之爭及另一個降班名額則須鬥到最後一輪才見分曉。勵馳今晚迎戰雀聯,前者篤定以第六名衝線,後者則確定降班,今場早成例行公事。講近期表現,雖然勵馳近五仗只得一勝兩和兩負,但明顯比起近五戰全敗及今季仍未開齋的雀聯好得多。有多名澳門隊球員的勵馳在人腳上亦佔優,由彭梓亨、蕭家源領軍的前線,足以撕破雀聯漏水的防線。加上首循環曾四球大炒對手,今場次循環再戰,有望再贏一場,用勝利告別今季。
雀聯除了人腳與勵馳相差一截,狀態亦低處未算低,今季十七場至今,四和十三負至今始終未能取得一勝,前線僅入九球但後防卻狂失七十球,失球數字僅次葡人之家排第二,差勁表現早早篤定下季乙組見。雖然今仗是其在甲組最後一役,為挽回面子力求一勝開齋告別,但仍恐有心無力,分分鐘再大敗一場,以八連敗結束今季。
留言