練海棠再偷食？

    伍詠薇：閉門審老公

    伍詠薇老公練海棠被指偷食大胸女兼車震，昨日伍姑娘開工錄節目時，被追問對此事的回應。她坦言要回家再向老公清楚了解整件事，自己亦自我反省，看看是否因為工作忽略了家庭。她表示老公有跟她說聲唔好意思，如果講“對唔住”就代表真的有做過，她也不希望老公會跟她說這句說話。

    多年前曾傳過出軌的練海棠，近日又被周刊記者拍到與大胸女子約會，並疑似車震。他的老婆伍詠薇昨日如常開工做節目，不少傳媒趕到電視台追問她對此事的回應。

    看到短片嚇了一跳

    伍姑娘明顯有備而來，十分淡定。她表示都有被這件事少少嚇倒，昨日一早已有記者朋友傳了這段短片給她看，她當時的反應是被嚇了一跳，之後冷靜一陣後再叫醒老公一起看。她笑言：“別以為我平日大癲大肺，但有起事來我好冷靜的，我會先問清楚老公發生甚麼事，但由於今日要開早，我哋只傾咗一個鐘頭，等錄完呢個節目，我會返屋企閂埋門問清楚佢。嗰段片影到佢個樣好開心，好似初戀咁，抵佢畀人影到。（你會如何對付他？）暫時唔睬佢，打佢屁股，你愈冷靜，個男人就愈驚。雖然我唔係完全相信段片嘅內容，但既然被影到晒，都要承認係真事，但都要先聽清楚佢點講，清楚晒之後先會知道點處理，但就唔會再同大家交代，今次最後一次公開講呢件事。”

    反省是否忽略家庭

    問她看到這消息是否好唔開心？她表示首先會自我檢討，看看自己又可有問題，想想自己是否因為忙於工作而疏忽了家庭？“是否我開工好夜先返家，大家少咗溝通，搞到佢同朋友出街飲嘢或者曳曳？但佢被人影到，證明佢係有出街，抵死，狗仔隊係是有用嘅。”

    問她如果老公真的出軌，會否分開其至離婚？她表示：“呢件事好難，我係信任家人，其他人可以評論佢，但唔能夠影響到我嘅想法，等返屋企了解清楚件事先啦。”

    之後，伍姑娘有感而發，表示七月便是她和老公結婚十七周年，“一段關係能維繫到十七年，並不容易。作為佢老婆，我需要支持佢，現在就反佢，又點算係家人呢？多謝大家關心，我先代練海棠向大家講聲對唔住。”

    不想老公說對不起

    問她會否叫老公出來澄清？伍姑娘說：“應該唔會，佢係圈外人，而且被狗仔隊影到，佢都得到報應。（會否取消慶祝結婚十七周年？）暫時未知，就算慶祝都會低調進行，大前提等我先問清楚呢件事。（老公是否已認錯？）佢講咗句‘唔好意思’搞到我，未至於要講‘對唔住’，但我亦唔希望佢講‘對唔住’，因為代表佢有做過。”

    她笑言老公已不止第一次被狗仔隊拍到，“上一次就真係冇嘢，佢只係同友人交收產品。我都知自己唔煮飯，經常叫外賣，但我堅持唔會學煮飯。（會否叫老公避免異性埋身？）這是雙向的，我唔會叫佢唔同女性朋友約會，總之要互相尊重啦。”