波蘭頂“德”住
場外打到七彩,場內踢得精彩,英俄對戰搞到馬賽腥風血雨,最終有英格蘭球迷被判監,英軍亦痛失兩分,英格蘭今次賠了夫人又折兵。今晚兄弟內訌,對住細佬威爾斯,黑起上嚟有條路,英格蘭隨時又失分。
明晨重頭戲當然係C組榜首大戰德國對波蘭,邊隊贏波就可穩入十六強。德國貴為世界盃冠軍,自然被較為睇好。但初盤要硬讓一球,波蘭亦非二、三流球隊,德軍要淨勝兩球先有着數,寧博波蘭更實際。
德國戰勝烏克蘭屬正路,全場佔盡優勢,基本上能夠控制大局,奧斯爾、卻奥斯及湯馬士梅拿等幾名核心都能發揮出應有水準,不過要去到補時才射入第二球,赢盤都贏得驚險。今仗對住波蘭,雙方踢法都比較熟路,尤其波蘭陣中的利雲度斯基、比薛斯克及巴拉薩高斯基等,都在德甲打滾多年,大家底蘊有幾多心知肚明。
波蘭上仗一球小勝北愛爾蘭,全場力壓對手,且攻守都表現出極佳水平。雖今場對手係更強橫嘅德國,但波蘭只要加強防守力度,再以穩守突擊踢法,絕對有力抗衡德軍。
推介:和波1:1
足球評述員 Ben
留言