紅牛應輸得心服
昨日講過德國最具冠軍相,不過現在有啲變心,因為睇完意大利擊敗西班牙後,覺德國真係遇到勁敵。估唔到意大利踢出一場超高水平嘅比賽,開賽頭十分鐘,幾乎已注定“藍軍”勝局。主帥干地完全對紅牛有針對性部署且相當成功,更令西班牙措手不及者係穩守之餘,亦採取主攻,且每一次攻勢都相當到位。干地睇通西班牙防線最大弱點就係高空波,多次高空攻門已令西班牙門前風聲鶴唳,西班牙應該輸得心服口服。
英格蘭爆冷輸畀冰島,輸波原因好簡單,整場踢法單調,基本上毫無任何戰術可言,鶴臣擺好每一個位置後,就任由球員自由發揮,點樣去穿透對手密集踢法,甚至進攻模式係點?根本睇唔出鶴臣有作出任何部署囉!最慘係八十六分鐘由拉舒福特代替朗尼,一係早換啦,呢個救命時間換人,等於幫對手浪費時間。
當然,輸波就係防守問題,一早講過英軍防線係最大致命傷,踢到淘汰賽階段,鶴臣應該加強中場截擊力。惜貪勝不知輸,鶴臣對自己球隊嘅自信心太過強。英格蘭十六強出局,又係一次教訓。
足球評述員 Ben
留言