莊思敏拍古裝戲險中暑
身高一米七六的高妹莊思敏(Jacquelin),近日與王祖藍在王晶執導的魔幻古裝新片《神魔道》中演“長短腳”之戀。片中飾演祖藍索老婆的她,早前北上橫店拍外景,雖然她Deep V戲服勁性感,心口有得唞涼,不過當地酷熱氣溫超過四十度,日日焗在沒有冷氣的攝影棚開工,之前更有幾個劇組人員中暑,熱爆錶程度可想而知。
向來捱得的Jacquelin首次拍古裝都差啲熱到中暑暈低,開工時她亦難免猛流汗,試過狂飲水降溫,但飲得水多又經常去廁所,着住古裝衫如廁又增加不少麻煩。Jacquelin說:“着住件重十幾磅嘅古裝衫,去廁所真係好唔方便,揪住件衫都手軟。大陸啲廁所濕漉漉,又驚整污糟件戲服,所以最後解決方法係冇必要嘅時候唔好郁,避免用太多體力,咁就唔會流咁多汗。”她最慶幸今次主要對手戲係同王祖藍拍攝,對方拍戲快、靚、正,故可盡快拍完返港。
留言