期待巴西奧足
今屆歐洲國家盃經已曲終人散,鍾意睇波嘅球迷又要“餓波”一段時間,因打緊嘅歐冠盃與歐霸盃外圍賽,不但冇得睇,且球隊都係不知名嘅“二打六”貨色,吸引力亦有限,唯有睇住中超頂吓檔。
要睇波就要等即將展開嘅巴西奧運足球賽,巴西以往稱為足球王國,惜近年戰績一落千丈,世界排名跌到十名以外,一四年世界盃身為主辦國,四強決戰一比七大敗德國腳下,季軍戰又吞荷蘭三蛋,兩場波簡直係奇恥大辱,最終只得梗頸四。剛結束嘅美洲國家盃連分組賽都出唔到線,認真令球迷徹底失望,森巴足球要重振雄風,今屆奧運男足非要奪金不可。
巴西曾經奪得無數次大賽冠軍,唯獨奧運男足從未稱王,一二年奧運男足只差一步,決賽一比二不敵墨西哥,當年陣中球星如雲,尼馬、馬些路、泰亞高施華、侯克及奧斯卡等,可惜都係與奧運金牌無緣。
對於今屆男、女足金牌,巴西寄予厚望,特別係男足,今次再由尼馬領軍,希望能夠首奪奧運男足金牌,阿Ben亦係巴西“粉絲”之一,期待巴西足球可以重振聲威。
足球評述員 Ben
留言