巴塞力敵雙“馬”
一連幾日講咗英超轉會情況,今日又轉吓講西甲,不離都係三頭馬車──巴塞、皇馬與馬體會。
衛冕嘅巴塞經已簽入三名新援,包括兩名法國國腳迪尼與烏迪迪,防線更加完整及有足夠替補力,另一位就係踢中前場嘅D蘇亞雷斯,呢位廿三歲後生仔相當具潛質,否則巴塞都唔會收歸旗下;不過,由於三大超級殺手美斯、尼馬及蘇亞雷斯在陣,相信“D蘇”只係做第四前鋒,最主要防線上加強兵力,巴塞今季更加強橫。
巴塞死對頭皇馬似乎以不變應萬變,至目前為止並無任何大動作,只有摩拉達與哥恩達奧回歸球隊,之前要爭法國中場核心保羅普巴已告吹。冇新球星加盟不特止,皇牌C朗因傷,季初應該唔踢得,皇馬開季都幾頭痛。
馬體會暫時只簽入克羅地亞國腳維沙爾高一名中場,個人認為對球隊起到作用唔大。另一消息係迪亞高哥斯達想回歸母會,但一日未離開車路士仍係未知數。馬體會要再向巴塞與皇馬兩大勁敵挑戰,前中後三線非要增強實力不可。如以目前情況嚟睇,新一季依然係巴塞天下。
足球評述員 Ben
留言