無線“秘書王”何綺雲

    黃金時段，合家歡時間，竟然出現野獸、美女、血腥的駭人畫面——面目猙獰的廖啟智伸一腳，靚女滾下十幾級樓梯；廖啟智獸性大發，再伸一腳，奄奄一息的靚女又被踢下十幾級樓梯……

    “喲，這靚女是誰，演很多無線劇集，幾乎晩晩都見她……”熒幕前七嘴八舌。“啊！這血淋淋靚女，專演秘書。”“哦，無線御用秘書，《愛 · 回家》的瑪姬，是史林廖賴律師行秘書，好似係。”無線鐵粉搶白：“現在升級了，任主席秘書；但衰格，有老公仔女，竟然同曹永廉有路。女人一定要做賢妻良母，搞搞震，一定出事。呢呢，惹來殺身之禍，自己攞嚟。”

    “阿姨，呢啲叫人在江湖，身不由己。”阿叔悠然論道，“與靚唔靚，姣唔姣冇關；和際遇有關。佢做主席秘書，之後做頂爺秘書，知好多機密。曹永廉乃擦鞋仔，必然千方百計埋身攞料。秘書啫，又唔係聖女，難得口甜舌滑、服侍周到的俊男噃。”

    “啋，咁烏糟辣撻。”阿姨慨嘆，擔憂戲中人，指住病床上的秘書王，花容月貌變了豬頭炳，血痕斑斑，氣若游絲。“真好戲，叫乜水，可惜成日做大茄……”

    這個《愛 · 回家》的“瑪姬姐”叫何綺雲，出身無線藝訓班，演戲近二十年。現於《律政強人》中與曹永廉偷情，遭鍾景輝胡弄，才被智叔伸兩腳，滾下二十級樓梯，口吐鮮紅，刺激觀衆刹那震撼。人人都問此女是誰？又證明了無線的“強姦”、“血腥”捧星手法成功了。早前輿論批評，無線靚女無姦不成星。熱播中的《巨輪2》中，勤勤懇懇的美艷港姐，也被一再強暴。《律政強人》美女如雲，獨選“秘書王”何綺雲偷情，復遭殺身之禍，果然，仍有一定效果。橋唔怕舊，至緊要受。不罵無線了，市場有求便有供；有這樣的觀衆，才有這樣的電視節目。顧客口味永遠不變麼？以前劇集閒閒哋三十至三十五點，近年頻頻吃驚風散，兩隻鴨仔（二十二點）已屬好景，一隻鴨仔浮游，生死存亡了。二十點響警報，十八點臨界，有腰斬之虞了。《律政強人》保持二十二至二十五點，難能可貴；倘彈出李佳芯、何綺雲，亦非奢望。

    高  梁