媒體
分類
新聞
黃宗澤 搭上黃翠如唱「雙黃」
2016-11-28 22:47
喺TVB台慶劇《幕後玩家》中有精彩演出嘅龔嘉欣，得知老公黃宗澤（Bosco）出軌後，爆喊嘅戲分獲觀眾一致激讚。對此，龔嘉欣話嚟緊劇中會畀Bosco逼到癲，佢話：「嚟緊我會更加慘，其中有一場戲仲喊到歇斯底里收唔到聲，拍完返屋企個心都好唔舒服，好耐未試過有呢種感覺，希望觀眾都可以感受到，真係好多謝大家咁支持。」
龔嘉欣爆喊嘅戲分獲觀眾讚好，一致睇好佢攞獎。
備受網民追捧嘅《幕後玩家》，唔單止感情關係出現混亂，唔少角色亦逐漸變奸，展現人性貪婪嘅一面。Bosco瞞住老婆龔嘉欣搭上劉佩玥，嚟緊佢會同小三劉佩玥攤牌，飛甩對方。為咗入大公司，Bosco轉頭走去撬老友蕭正楠牆腳，狂追黃翠如，「雙黃」更會連成一線食咗間公司。黃翠如愈變愈衰，佢利用完蕭正楠後，轉而同Bosco喺埋一齊，多角關係十分複雜。
黃宗澤嚟緊會硬撬老友蕭正楠牆腳，為咗利益奸到盡。
留言