展鵬唔屬好戲派

    誕生大滿貫視帝、大滿貫視后，無線史上最有價值的《萬千星輝頒獎禮》，收視率竟跌至十年來新低，僅廿七點六，去年也有二十八點。史上最多觀眾圍觀視帝、視后“臨盆”的，〇九年有四十點，約二百六十萬觀眾，見證“柴九”黎耀祥、“四奶奶”齊登寶座……

    新鮮超級帝后出爐，為何創最低收視率？ 仍未見高人評價。在下淺陋之見：兩位超級帝后台上（熒幕）好戲，台下似嫌不夠好戲——展鵬、定欣，焦點中的焦點，處於高潮中的高潮之際，觀眾狂呼帝后公開“咀嘴”，若徇衆要求，必贏得萬衆歡騰的；但是，幾個環節中都尷尷尬尬在婉拒。不知廣大觀眾怎樣想？個人看來，非常悶、好厭煩，不禁搥胸頓足，暗暗叫苦，活生生一場好戲浪費了！

    也許有戲迷想起周潤發——

    看慣王者“戲派”的發哥，或許會這樣演繹：叫我咀吖嘛，你哋眞係好嘢。你睇定欣眼甘甘，朱唇半翹，佢都恨咗好耐我咀佢！嚟啦，嚟啦，你恨到啦，我來咀你啦。張開鐵臂，依起棚牙，欲撲未撲（定住等對手戲）；定欣發晒忟，掄起粉拳在個郎胸前肉緊捶打……視帝曰，你睇，打者愛也！記者推波助瀾，咀！咀！咀！“我唔想    ，還你心願咋。”好衰    ，連我嘅對白都搶埋。

    嘴對嘴，四唇一印，定住五秒。翌日，視后視帝接吻魚照應可刋出半版大。粉絲明白，台上做戲，台下也做戲之嘛。看得出，胡定欣很開放；陳展鵬未慣大場面，謹小愼微，字字拘謹。能像發哥玩弄粉絲於股掌之間，就是另一層次了。可曾料到“帝后”一咀，便成今屆頒獎禮象徵，收視可能颷升至三十五點，展鵬捧帝時突至二十九點了。

    記者問，有否見家長？展鵬回答屬於幼稚園級數：“我又冇犯錯，為甚麼見家長。”帝級人馬呀，大可反窒娛記：“呢個問題唔係問題”，展鵬不妨一字一頓：“我日日都見家長，我住屋企嘛。”

    頒獎禮很熱鬧，卻哄不起來。超級視帝視后，台下自編自導之時，演技無火花。展鵬若夠薑，熱炒咀嘴的話：“前晩看到《致命》一吻，安仔與蚊蚊吻得纏綿，睇到流口水。睇過安蚊咀，鵬欣要拜師再吻，無謂獻醜。”娛聞不炒不樂聞。

    高  梁