咪咪姐估佢唔到

    成功藝人，有條方程式：畀你估到，我就唔係周星馳……朱咪咪人日紅館演唱，變成“豬妹”。她唱《IQ博士》時，一衆舞蹈員將其中歌詞“豬仔嚟啦”，改成“豬乸”、“豬茜”（《唐伯虎點秋香》角色），全場爆笑。朱咪咪喘氣大駡舞蹈員，“未見過少女？未見過咁靚少女？未見過有魚尾紋少女？眞係冇氣，太耐無做少女啦。”朱咪咪扮學生妹似隻企鵝，乜都“曉”。觀眾拍手大笑。據講，喜劇有秘方，千萬不要宣揚人類偉大，要揭人類“衰嘢”。飛天，不好笑；跌到四腳朝天才好笑。

    亞視舊將“黑仔”姜皓文，與朱咪咪合唱亞視電視劇金曲。咪咪姐即扮收到無線高層電話，叫姜皓文快轉台，否則會被照肺。“無線醫療福利很好噃……”“黑仔”扮傻。“高層照肺，不用錢的呀。”觀眾笑聲中，兩人合唱《難為正邪定分界》。

    兩個囝囝獻花，三母子合唱《海闊天空》。咪咪姐明言，不想兩個仔做藝人，“仍供緊讀大學，如做藝人，就浪費學費……”又透露大仔年尾結婚，想不到自己快做奶奶了。

    做藝員，不用讀大學，以免浪費學費——請高明正義的評論員稍安毋躁。朱咪咪自身經歷而已，“九十年代我第一次上紅館，做尹光的嘉賓。當時，我只是二打六酒廊歌星。中間人打來邀請，我還駡人黐線，Cut線。哈哈，同年七月，張耀榮幫我開個唱，我便將酒廊技巧用於舞台，第一位在紅館請觀衆上台與歌手交流……”朱咪咪回首前塵，“一切皆是命，半點不由人。若非當年新加坡受情傷，也不會誤打誤撞來香港發展……”事業版圖拓展至公仔箱及大銀幕，更是周星馳電影中的御用“奶媽”。

    朱咪咪舞台教子，“媽咪很驕傲，我沒有後台，沒簽大公司，又不是後生靚女，仍可以在香港開這麼多場演唱會。仔呀仔，你哋要慳啲使，若將媽咪啲銀紙撕開，裡面不是血，而是口水，唱歌搞笑，要用很多口水呀。”

    傳說，人日演唱，是朱咪咪最後一次紅館騷，因為年紀也大，每次開騷都一腳踢，聰明伶俐的咪咪姐也深感壓力。所以她才放棄再開紅館騷，並非有暗病或退休。

    高  梁