觀衆口味轉得快
黃金時段三線劇集,巨星如雲,近期能獲視迷大讚好戲的,只有兩個人:田蕊妮、何遠東!都因為在劇中殺了人,且狠心殺親近的人,繼而心理不平衡。這哭笑無常的變態殺手,居然成了受歡迎角色。阿田話難以抽離角色,很抑鬱,友好排隊慰問。前兩晩,無線劇集又殺人,兒子刀捅惡母,網民反而大讚,“東東弑母時的喪心病狂演得好,喊戲夠催淚。”他在無線“九年扮傻無人識,一刀弑母街坊知”。翌日,東東大埔街市閒逛,菜檔姐姐冧讚他好仔又好戲,十分孝順,經常陪媽媽買餸。有阿叔豎起拇指,笑東東若不做演員,可轉行做區議員……
一劇“殺人”,視迷哄動,證明何遠東好戲,也說明了觀衆的口味轉變了。早一陣,靚女排隊被强姦,每姦必哄動……今年田蕊妮殺人一紅再紅;繼而何遠東弑母,鹹魚也翻生。橋唔怕舊,至緊要受。看來,今後無線劇集,各類兇手層出不窮……一殺便紅,但願此風不可長。
“聽過好多冷言冷語,話我只係識搞笑,但又唔係眞係好笑喎!今次,好似一鋪過所有嘢返晒嚟。”九年在無線,做“御用細佬”,負責搞笑;絕地反彈,卻是捅死阿媽,搞喊才是一戰功成!天意難測,機會只送給隨時有準備之人。
“好感激父母冇反對過我演戲。當年演藝學院學費五年要二十萬,父母即刻話幫我!畢業後我乜都做,收入唔算差,有一次,捱到幾乎暈低……”人生不如意事十常八九。東東受訪,一再垂淚,“一三至一五年,事業停滯不前,被另一半拋棄,又遇上最疼惜我的阿姨去世,際遇好痛苦,還要返公司拍開心嘢。個世界好似咩都冇晒咁,諗過好多自殺方法。我未係信基督,有晩見到窗外十字架,我喊晒,之後慢慢放下。”
不講不知,何遠東是演藝學院高材生,活躍劇壇。三年前憑《華佗六頂記》提名劇帝;他卻甘心做電視配角。“我唔係想做明星,只係想做一啲角色,畀觀眾講一世嘅角色,知道我係一個演員。”
多次扮肥肥的何遠東,二百三十磅,減了五十磅之後,仍然是個肥仔。“問阮兆祥好唔好減肥博一博?他說玩多十年先啦。但我驚到時關節唔得,跳唔到舞……”
高 梁
留言