利物浦遇拉“布”
【本報消息】英超利物浦今晚作客西布朗,紅軍上輪幾經辛苦才反勝中游球隊史篤城,一七年要到四月才初嘗客場攞晒三分滋味,神經刀表現遇着聯賽兩連敗的西布朗,牌面佔優亦有失分危機。
利物浦踏入一七年後作客三和二負未贏過,要踢到上輪才二比一驚險反勝史篤城取得一七年首勝,客場表現絕唔穩陣。雖然紅軍近六場聯賽保持不敗,只是進攻核心文尼因傷提早收咧,古天奴又連場大戰體重急降,加上中場拉蘭拿、亨達臣繼續因傷唔踢得,中前場可用球員買少見少,再踏客途要贏唔易。西布朗積四十四分排第八位,既無護級壓力、爭歐戰又機會渺茫,高不成低不就錄得聯賽兩連敗,但球隊近三次主場面對紅軍都保持不敗,再度主場出擊有望搶分而回。
不指望巴西孖奴
古天奴剛剛病癒,費明奴亦因賽事太頻密一直未在最佳狀態。領隊克洛普指贏波不能指望巴西孖寶:“所有球員一齊發揮作用非常重要,如果只有古天奴和費明奴發揮作用,那就非常困難了,己隊贏波不能僅靠兩人。爭前四?我能說的是,只要贏今季餘下的所有比賽,就能取得歐冠資格。我認為這是非常肯定的,即使一些球隊比我們少踢一至兩場,但他們互相之間有比賽未踢。爭前四難度非常大,西布朗是巨大的挑戰,己隊必須投入百分百專注度,這是我們需做到的事情。”
留言