細訴生命中五個女人

    謝賢揭與芳芳分手之謎

    謝賢（四哥）早前接受鄭紹康為奇妙電視主持的《天下第一Friend》訪問，今個周六會繼續播出。四哥在這集節目中，細訴他生命中的五個女人，分別是甄珍、嘉玲、蕭芳芳、狄波拉、CoCo，他更首度自爆與芳芳分手的內情。

    謝賢（四哥）在節目中曾感慨表示想不到兒子謝霆鋒會跟自己同樣走上離婚之路！日前四哥作客鄭紹康為奇妙電視主持的節目《天下第一Friend》時，談及此事也不禁哽咽道：“呢個係我孤獨老人嘅創傷，每次想起都難免落淚！”

    與狄波拉離婚問過仔女

    四哥和狄波拉結婚廿五年後離婚，此事對霆鋒可有影響？四哥不以為意說：“應該冇！我哋決定離婚時有徵詢過仔女意見，霆鋒好瀟灑，佢好贊成我同拉姑做返朋友，所以就算有影響，佢應該都識處理！”

    四哥自嘲是個不知所謂的爸爸，管教霆鋒和婷婷，從來是狄波拉的事。四哥表示拉姑是賢妻，但不是良母，因為她管教子女好嚴厲。四哥和拉姑最教人嘖嘖稱奇的是他們離婚後依然是好朋友，四哥甚至和拉姑現任老公的關係都不俗。他笑稱：“有次拉姑開車來接我，佢老公都有來，仲坐喺前座。我一上車就同佢講：坐返後面，我係前夫梗係坐前面啦！”

    讚芳芳好女仔唔想害人

    除了拉姑，四哥還細數他生命中的四個女人：“第一個係嘉玲，同佢失敗咗，因當年我太貪玩。”而他第二個女朋友係蕭芳芳，四哥坦言：“佢好乖，係我決定要離開佢！因為佢提議我去學英文，我心諗，連玩都唔夠時間，你仲要我去學英文？不過知道佢係好女仔，我唔想害人啦，最後決定退出，我覺得自己做咗件好偉大嘅事。”

    四哥和甄珍的結合，是在光藝年代，二人拍拖四年，結婚一年便分手。四哥回憶說：“簽咗離婚紙後，我喊咗十五分鐘，然後我同自己講：唔好再諗，然後就放低咗！”

    叫CoCo遇到好男人就走

    至於他與現任女友CoCo，已拍拖逾十年，四哥坦言不會再婚：“名份係假嘅，我都係八十（歲）後啦，所以我同佢講，遇到個好嘅就走啦！”被問到他今時今日是否還“有心有力”？他笑道：“依家有心多啲！哈哈哈，呢樣嘢冇得認叻！”

    另外，四哥坦言好錫張柏芝。他說：“我成日同人講，我好錫呢個新抱，因為佢幫我生咗兩個孫，有咩好得過畀兩個孫我呀，係唔係？（可有和王菲見面？）呢樣唔理啦，我哋屋企人唔興問呢啲嘢！”