政府有意再推與內地駕照互認，引起坊間不少憂慮和批評。交諮會前委員黃東批評，對於市民的憂慮，政府的回應力度都不盡人意，連基本的理據和數據都無法交代清楚，市民的憂慮並非多餘。他亦擔心有關政策出台後，會令澳門交通百上加斤，進一步加劇社會的民怨。他認為，中央並非鐵板一塊，但特府現時卻似是經常用中央政策向民間施壓，這是官員表忠自矮化的表現，同時亦是要中央「食死貓」，陷中央於不義。他說︰「不支持，有保留，不等於反中央，反政策，而是政府現時俾的資訊不足令我哋放心。」
黃東認為，政府今次有意再推駕照互認，是港珠澳大橋既將通車的效應。他留意到，現時有部分意見指反對有關政策就是「澳獨」、反對國家大政等等上綱上線的批評。但他認為，市民的憂慮是有箇中道理的，「通過之後，澳門每年增加多少內地司機？官員現時用香港作例子，但港澳有別，兩地的法治、交通狀況係咪可以相提並論呢？之前有個消防局富二代揸林寶堅尼撞死人都無事，賠錢就了事，呢啲嘢會唔會係香港咁易出現？唔擔心就假既。無合適的理據，除咗夾硬過之外，都無咩辦法。政府連好多基本的理據和數據都無法交代，咁就要市民隨便答應，作為一項長遠的公共政策是否合理？」
黃東預料港珠澳大橋開通之外，澳門交通勢必惡化，「車流量、人流量多咗，在未考慮清楚正負面影響之前就去推(駕照互認)，咁第日點算？呢樣嘢可唔可以收返？唔可以架嘛。市民要求只不過要穩重，不是為反對而反對，而是要求當局做好一些，現時交通成為澳門最大的民生障礙，仲加啲嘢落去更加惡化，外勞黑工，道路承載力帶來衍生的法治問題，通通都無交代清楚，市民的憂慮並非多餘的。」
黃東相信即使是國家政策，但中央亦並非鐵板一塊，亦無證據顯示中央一定「大石砸死蟹」，凡事都應該可以溝通，「但佢哋(特區官員)有無同中央、國家交通部傾過？有無反饋過市民的意見，乜嘢都關埋門，乜嘢都當機密處理。」他質疑本地官員為了表忠就自我矮化，沒有將澳門的社情民意如實向中央反映，便用「大勢所趨」、「中央政策」等藉口壓下來，市民接受，但這變相是要中央「食死貓」。「下情無法上達，就令到政策變形走樣，有時未必真係完全是中央意思，但係佢就加鹽加醋，即係好嘢都變咗衰嘢，擦鞋唔緊要，呢個係中國官場文化，但係你擦到上塊面都黑晒的時候，咁咪變成做衰咗政策，衰咗又賴中央。」
 
相關報道︰
政府欲重推內地本澳駕照互認
議員、市民現分岐
https://goo.gl/8w3SNQ