新劇與楊明有互錫戲
黃嘉樂驚女友呷醋
黃嘉樂、江嘉敏、林景程、吳沚默及黃子恆等昨日出席明珠台《好醫生》第三季記者會,眾人以醫生造型現身,黃嘉樂對住江嘉敏搞笑稱:“你要畀我醫,因為你冇腦。”
首次穿上醫生袍的江嘉敏,直言很想當醫生:“我未演過醫生,好想演醫生角色。但可能本身入行年資淺,多數演妹妹、學生及女友角色。因為從小到大夢想就係做醫生,無奈成績唔允許,我又怕接觸死人。(唔怕見血?)我唔驚出面的血,但驚自己的血,以前成日流鼻血,所以係資深病人。”被問到可會嬲黃嘉樂指佢冇腦?嘉敏笑說:“我唔敢同前輩頂嘴!同嘉樂合作過三次,佢都係演我男友,好鬼熟,否則打佢。”她自言係玩得之人,但底線是不能涉及身邊人,例如家人或朋友。
江嘉敏又自爆近日忙於拍《七公主》,因檔期問題以致未能接拍《金宵大廈2》,反而因為髮型關係,可能要戴假髮拍攝,問到要她剪短髮拍戲可接受?她說:“剃光頭都OK,我睇過《金2》劇本,角色好有發揮, 接拍唔到好失望。”
黃嘉樂曾在《白色強人》中飾演醫生,對於會否有份參與續集拍攝暫時仍未知。他表示近日忙於拍另一套劇《我家無難事》:“因為撞期,未知可唔可以拍演其他劇。”
在《我》劇中,嘉樂與楊明不乏對手戲,兩人更有一段疑似“Hehe情”。嘉樂透露昨早才與楊明同場拍戲,問到楊明的狀態如何?嘉樂說:“佢都唔知幾精靈,今朝仲拍一場同佢分手的戲。 (楊明有冇揸車返工?)我唔見佢揸車喎,因我遲過佢走。(會唔會載佢一程?)之後有需要我都會車埋佢,不過佢都有個寶貝(莊思明)車佢啦!”
問到莊思明可有探班?嘉樂表示未見過思明出現,不過他笑說:“我都會同莊思明講聲,我會同楊明有一場互錫戲。(驚唔驚同楊明錫錫會令到莊思明呷醋?)我怕自己女友呷醋多啲,思明好大方。(之前傳楊明與女演員拍戲,思明去監場?)啲人亂講嘢。”
留言