無綫《萬千星輝頒獎典禮2020》將於本周日（10日）晚舉行，視帝、視后之位再成觀眾熱話！不少傳媒賽前預測備受力捧的龔嘉欣成視后大熱人選；至於視帝寶座競爭超激烈，除了多位歷屆視帝黎耀祥、陳豪、王浩信，甚至連陪跑16次的林峯也挾《使徒行者3》「爆Seed」一角加入戰團，不過，當中的黑馬張振朗也不能睇小，一年內總共有五劇擔正，包括現正播出的《堅離地愛堅離地》，完全有力狙擊一眾前輩。（文：黎永樂　圖：相關機構）

張振朗近日出席新劇宣傳活動，期間接受記者訪問，大談「開戰」前夕感想，他主演的五部TVB劇集先後於去年播出，他直認2020年是他的豐收年，同時感恩觀眾肯接受他演的每一個角色：「五個角色都唔同Style，係我做每一個角色嘅要求，好多謝觀眾接受我。」他同時在今年頒獎禮上獲「最佳男主角」與「最受歡迎電視男角色」提名，他對獎項抱著平常心：「今年觀眾接受咗我已經好開心，慢慢一步一步嚟，唔急。」比起男主角，他反而更想奪得「最受歡迎電視拍檔」一獎。

《堅》劇首次做男一

張振朗有份演出的《堅離地愛堅離地》，因同演的黃心穎形象受損連累劇集成倉底貨，等足三年終於出街，振朗稱如今的他絕對不能再演活這個角色：「身形、外貌、髮形，心智上都好大唔同。好多人都話我嗰時好細個，而家大個咗好多，證明呢三年我大個仔咗，都開心。」《堅》劇是張振朗首次做男一的劇集，回想起當時接拍的心情，他用熱血和落力來形容：「落咗好多心機，每一場戲都諗好多，喺骨髓度攞靈感去拍。」他希望觀眾能評價他的演出，即使是好壞也不介意，他覺得聽取別人意見才有進步。

睇好黎耀祥稱帝

其實張振朗一早坦言睇好黎耀祥稱帝，至於與振朗並肩作戰的好拍檔王浩信，今屆再憑人氣劇集《踩過界II》「盲俠」一角競逐視帝，他近日亦有接受傳媒專訪大談得獎信心，他謙稱不想太多：「每年都唔知，所以都係唔好諗好啲，盲俠個角色唔易做，又要演盲，又有法庭戲，對白又多又快，而且套劇好有驚喜，我睇嘅時候都喊咗好多次。」曾奪此角奪過視帝的他再次角逐，他自認今次對演出有進步，細節位掌控得更好。提到前輩林峯都爭埋一份，他表示：「林峯好強勁，係師兄，識英雄重英雄，交畀觀眾處理。」

被力捧視后無壓力

至於視后方面，入行13年的龔嘉欣憑《香港愛情故事》與《殺手》打到周身傷的賣力演出，令觀眾留下深刻印象，今次台慶頒獎禮她可謂鋒芒畢露，外界甚至推測她是視后大熱之選！談到賽前心情，她說：「之前會緊張啲嘅，依家反而放鬆晒，冇咩壓力。呢次提名最開心係得到觀眾嘅認同，大家睇住我由小妹妹開始成長進步。其實邊個得獎，我都會咁開心，位位演員都付出咗好多，唔想比較。」

張振朗一年內總共有五劇擔正，完全有力狙擊其他對手奪視帝寶座。

王浩信（左）憑「盲俠」一角競逐視帝，究竟好友張振朗能否截糊搶獎？

張振朗與龔嘉欣有份演出《堅離地愛堅離地》，兩人都答謝觀眾對他們的支持。

陪跑16次的林峯挾《使徒行者3》「爆Seed」一角加入視帝戰團，能否破蛋睇今次。

龔嘉欣在《殺手》中打到周身傷，為搶視后寶座勁賣力!