與杜燕歌演忘年戀

    張秀文男女通咀

    鄭丹瑞、敖嘉年、張秀文、蔣家旻、林德信與王灝兒等宣傳新劇。鄭丹瑞投訴監製潘嘉德設計劇本時，每位演員都有咀嘴戲，唯獨他冇；又指林德信與王灝兒好合拍，說話口音一致，中西合璧。

    鄭丹瑞（阿旦）、林德信(Alex)、王灝兒(JW)、張秀文、敖嘉年等昨日出席新劇《欺詐劇團》宣傳活動。由同時是該劇演員的阿旦分別頒發最佳神隊友、最合拍情侶、最佳造型和最具慧眼獎給劇中各演員，不過阿旦就“投訴”自己不單無份獲提名，甚至在劇中也沒有親熱戲，笑稱：“劇中每位演員都有咀戲，連杜燕歌都可以咀張秀文，唯獨我冇！導演解釋話因為我係男主角，用嘴說話便可。我質問完導演後，在圍讀時已嬲到拂袖而去。”

    張秀文在劇中有多個造型，更與杜燕歌有段忘年戀，先後與杜燕歌和蔣家旻有接吻戲。她笑說：“我平時好少拍咀戲，就咁樣畀咗燕歌！記得拍攝之前，佢仲對我單眼打眼色呢。”敖嘉年就大爆原本杜燕歌太太韓馬利會探班監場，“可惜最後有工作在身來唔到”，他又大讚燕歌在拍咀戲前已刷牙、做足個人衛生。

    張秀文被問覺得杜燕歌還是蔣家旻好咀？她笑道：“各有各好，有唔同味道。不過女仔錫女仔就比較特別，而且蔣家旻的嘴唇很性感，錫落去時感覺很濕潤軟熟。”問佢有冇刻意NG錫多幾次？秀文說：“咁又唔使，我怕蔣家旻會迷戀我！而且我們為劇中拍AV角色封面照時已經玉帛相見，咩都見過。”蔣家旻就說：“拍那場戲有點難度，但都唔會覺得尷尬。”

    Alex與JW都是首次拍TVB劇，JW更演奸角並瘋狂迷戀Alex，不過兩人就沒有親熱場面。Alex開心地說：“無論演員或幕後，現場氣氛都很好。JW好搞笑，每日收工都好興奮，試過拍完自己的戲份都唔捨得走。”JW解釋道：“因為係我第一次拍劇，不知道會否也是最後一次，所以最後一日戲拍完時都忍不住喊。”JW又稱很喜歡劇中角色瘋癲的個性，但強調現實中對男友不會這樣狂野。Alex表示從今次合作中感受到JW對演戲的熱愛，JW也多謝Alex：“今次飾演的角色好癲，自問無演戲經驗，多謝Alex唔介意陪我排戲，令我可以好安心咁拍攝。”

    敖嘉年在劇中飾演落泊導演：“最深刻一場是我向投資者賣橋段被拒絕，停機後仍忍不住攬住劇本喊。因為我本身都是讀電影出身，好明白做導演的辛酸，所以感同身受。”