烏克蘭“利”刃出鞘
【本報消息】歐國盃C組烏克蘭鬥奧地利爆發生死戰,兩軍同積三分、贏波一隊即鎖定出線資格,其中烏軍實力、狀態稍勝半籌,煞科戰有望笑到最後。
烏克蘭外圍賽力壓衛冕冠軍葡萄牙首名入決賽周,只是首戰二比三不敵荷蘭遭遇開門黑,幸上輪二比一力克北馬其頓,與今仗對手奧地利同樣手握三分,贏波即鎖定十六強資格,戰意爆燈當決賽踢。前線孖寶耶林卓克、耶莫蘭高連續兩場有波入腳風大順,中場仙真高、沙柏蘭高及馬連路夫斯基技術一流帶動攻勢,即使基維索夫為首的防線近兩仗失五球唔可靠,以攻代守贏波仍睇高一線。奧地利暫一勝一負、得失球不及烏克蘭排第三位,今仗搶分爭出線決心同樣十足,只是射手阿拿奧杜域繼續坐波監,鋒線數糊能力削弱,即使薩碧沙、阿拉巴等各具實力,想要贏波晉級唔易做到。
荷蘭“北”勝無歸
同組荷蘭鬥北馬其頓,橙軍小組兩連勝提早鎖定小組首名晉級十六強資格,料迪比、韋拿度姆及迪莊等主力或輪休避戰,仍有馬倫、加雲貝治、韋真達爾等新星準備上位,面對決賽周新丁北馬其頓依然實力佔優,小組煞科戰拒爆冷輸波。
荷蘭中場迪莊要踢好比賽:“提前鎖定出線的感覺真好,但我們仍然希望贏得小組賽最後一仗,以連勝姿態開展淘汰賽階段。我感覺自己好健康,感覺非常好,會否落場會聽從教練安排。我們都好期待能在坐滿觀眾的體育場比賽內,希望能有很多荷蘭球迷和我們在一起,可以打造出一場足球派對!”
留言