確診新冠肺炎的一家四口正被隔離治療,特區政府發現個案後亦馬上分區分級防控,追蹤與患者有過「一面之緣」的人士,雖難度未至於大海撈針,但要確定他們曾「到此一遊」的地方已經好頭痕。確診夫婦所到之處多到自己都唔記得,隔離十日後,衛局公佈兩人的最新行蹤,遲就肯定遲咗,但都要呼籲與患者有過共同軌跡的人士做核檢,並對相關地點進行清潔消毒,而要搵的人是未知數,只好防得幾多就幾多!
兩名患者喺八月三日被衛局搵到,遺忘了三、四日前曾去過水坑尾公共行政大樓及銀行等地。相關的政府部門亦因此要暫停開放,部份服務要遷往其它地方。二人前往有關地方為的是辦理事情,而非無聊閒逛,按理較容易記起,或許他們的私人業務太過繁忙,一吓子記唔起。幾日前都可以忘記,如今十幾日後,共同軌跡的人士都未必能諗翻起。不過,如上述所言,去過特定的地點,做過重要的事情,應該想得起。
遺忘的豈止咁多,原來二人又去過兩間電訊公司門市部,未知有冇摸過新款手機,去過的人又記唔記得起。目前距離政府爭取十四天後恢復正常的目標,尚有約一週的時間,一次核檢未必有效,即使隔離結束後也有機會確診,但願兩人已經全部記翻起,再沒有遺漏,否則只會令疫情變數愈來愈大,隨時出現社區爆發,而共同軌跡者記語起都唔緊要,如果唔肯定又有懷疑,就走去做個免費檢測,以策安全。
山草
留言