與學友合唱曬幸福

    李幸倪願望成真

    李幸倪早前推出新歌，好快已連登中文歌曲龍虎榜兩周第一位，更被粉絲催促加把勁做多啲宣傳。幸倪笑言每個打歌榜流程都唔同，有得與偶像合唱已經心滿意足。

    李幸倪(Gin Lee)早前推出新歌《日出時讓街燈安睡》，今次她更成功“解鎖”，邀得偶像“歌神”張學友一起合唱。難得兩個唱得之人合體，加上幕後班底有郭偉亮(Eric Kwok)作曲、林若寧填詞，粉絲皆笑言“這個組合預咗爆紅”。新歌果然好快就登上港台中文歌曲龍虎榜，而且連續兩周高居第一位。

    Gin Lee亦開心得連續多日在社交網站曬相發文，分享新歌錄製過程的開心事。她笑言：“今次同張生的合作非常奇妙，好似係冥冥中有安排咁，所以迫不及待想和你們分享更多的故事。首先多謝Eric寫咗首歌畀我，我在屋企練歌時，總係覺得呢首歌應該要有個合唱版。機緣巧合下，有日Eric的太太Grace夢到我與學友哥合唱，Eric就索性問公司‘不如試吓搵學友哥’，結果學友哥聽完Demo就好鍾意啦！亦對林若寧的填詞好有感覺，最後應承咗今次的合唱。”Gin笑言有此機會，當然係感到奇妙又有點唔真實：“當日去到錄音室，Eric古古怪怪咁話要拍嘢，但又唔講拍咩。一直都好疑惑咁聽佢講嘢，結果我竟然聽到一個天大的好消息。坦白講，由知道呢個消息到錄完呢首歌，我都唔敢同人講，實在太似一個夢了！”

    粉絲當然好戥Gin開心，紛紛留言恭喜偶像。不過也有心水清的粉絲發現Gin的新歌在TVB的勁歌金榜、商台叱咤樂壇流行榜及ViuTV的Chill Club推介榜等仲未上榜，即時肉緊留言道：“MV係好好睇！恭喜連續兩星期冠軍，希望好消息陸續有，應該拎到更多No.1。”

    Gin表示其實每個打歌榜的流程都唔同，粉絲唔使太緊張，好快應該會有好消息。Gin笑言想不到在自己的歌唱生涯中會有與歌神合唱的一天：“在我心目中，他的歌藝與堅持是專業的標準，亦是我學習的榜樣。有得同偶像合唱都已經心滿意足啦！”