近日，特區政府在聖誕前夕，一口氣帶畀大家三個「驚喜」，實際是有驚無喜。不過就足夠讓坊間熱議一番，叫人㷫烚烚，再凍都不怕。所說的當然是廉署嗰份教育發展基金資助報告，還有審計署對澳門投資發展股份有限公司在中山項目的衡工量值，一浪接一浪，相當緊湊，差點唞唔到氣，再來就是廉署反貪揭發有「失憶證人」之稱的前工務局局長涉嫌收受巨額賄賂，一共八人涉案，由於案情嚴重，「主角」與其中兩名嫌犯被強制羈押，呢鑊真喺過唔到年！
從教育資助、投資發展，到審批工程，涵蓋多個範疇，反映的豈止是報告或案件本身的嚴重性，而是特區政府成立二十二周年以來，內部管理以至監管仍是一團糟，只是在年尾「埋單截數」，衡量功過。多年來，澳門在教育方面的投入十分積極，十五年免費教育人人有書讀，本是一大政績。政府對學校的資助也因此愈來愈多，學校配合政府教育政策，持續提升教學質素及環境，解決裙樓學校的「藍天工程」正是如此。
各所學校為做出驕人成績「報答」政府，自然希望「力臻完美」，但開大咗個頭就很難收，更容易偏離正軌，就如廉署報告指有學校奢侈豪裝。值得一提的是，審計報告早就提醒過教發基金，但不見改善，致使廉署跟進查調才揭露行政違法。審計可以說是「前菜」，所以澳投公司要認真檢視不足加以改進。雖投資不是穩賺，但切記「唔熟唔食」，非自己專長就唔好亂搞，否則有如倒錢落海，而投資房地產，消委會都有教要“五證齊全”。勿學「失憶證人」咩都唔記得，咁樣分分鐘會領嘢！
山草