輕軌氹仔線因全線更換電纜，上月初始恢復營運，但載客量無甚大變化，日均維持二千人次以下。由於其它重要路線的建設工程尚未完成，輕軌集體運輸效用仍未能體現出來。坊間一直有聲音希望輕軌與巴士之間能提供轉乘優惠，吸引乘客，以提升前者的載客量，達至輕軌為主，巴士為輔。在「轉乘優惠」的問題上，運輸工務司司長斬釘截鐵表明唔會有，理由好簡單，輕軌公司是政府全資，巴士則私營公司，所以很難傾。
輕軌與巴士接駁提升運載力的想法，看來短時間內都難以成事。事實上，即使不是公、私營傾唔埋欄的問題，以現時輕軌單丁一條氹仔線，要吸引更多人搭乘已是一個很困難的問題，那怕有轉乘優惠，相信也刺激不起「銷路」，或許放假會有多咗人搭，畢竟要視乎乘客的實際出行需要。至於將來則難說，現時其它路線正動工興建，幾年後，當輕軌佈局較全面時載客量或有改變，屆時再去檢視和改善轉乘的問題也未遲。
當然，難傾唔代表冇得傾。老實說，即使巴士公司已實施新約，但每年都是靠政府億億聲的財政援助來營運，說是以市場模式運作，實際咪又喺政府主導。所以要傾當然可以傾，但最後都可能是「塘水滾塘魚」，使的都是公帑。輕軌和巴士本身都有乘車優惠，而輕軌營運至今有蝕無賺，將來的發展也不容樂觀。若只有票務作為最主要收入來源，唔加價已經偷笑！討論空間唔喺冇，但先要視乎未來輕軌和巴士之間的客量變化。
山草