為謝高晉新歌MV助陣

    陳靜鍾意運動型男

    謝高晉為新歌拍MV，除了邀請陳靜助陣，還請來師妹何天嵐擔任新歌MV女主角。當三人合照時，左右逢源的謝高晉秒變怕醜仔，自爆自己的熒幕初吻早已獻出。

    女星陳靜(DaDa)昨日為歌手謝高晉的新歌《謝絕關心》拍MV，低胸裝上陣的她表示心情緊張：“因為好耐冇同異性有親密接觸，MV中我飾演一個好有控制慾同支配慾的女朋友，我要主動去做親密行為。（有咩親密戲？）冇接吻，但會跳貼身舞。（你都着得好性感喎？）OK啦，最重要係舒服同配合角色。”

    DaDa透露今次是她第二次拍MV，第一次拍MV時只有十八歲：“其實中間有人搵過我拍，但我當年專注拍電影，就推咗。我同謝高晉係同一家電影公司，算係我半個師弟，我都幾欣賞佢，所以就幫佢手，而且個角色都幾有挑戰性。”她笑言自己性格跟角色剛好相反，喜歡被控制多過控制人：“我鍾意男仔做主導，因為我唔鍾意話事，最好唔好叫我做決定。”

    講到感情生活，最近頻頻收花的DaDa，聲稱所有花都是朋友所送：“我的朋友好錫我，我好感激佢哋，我真係好鍾意花。所以我決定自己種，唔需要人送。”她坦言期待拍拖，但唔心急：“近年我專注做運動，好享受同好開心，期待邂逅更好的人。（擇偶條件要鍾意運動？）一定要！仲要陽光同自律。（謝高晉係籃球員，啱晒你？）一陣了解吓。（唔介意年紀細過你？）年齡唔係問題，我冇年齡限制，我係睇直覺，用時間去觀察一個人。”

    謝高晉透露MV講述人生會經歷很多愛情，但始終初戀難忘。問到現實中初戀是否難以忘懷？他說：“都幾難忘，我十五歲拍拖，大家有好多共同嗜好同經歷，細個覺得一齊淋雨好浪漫。（同初戀仲有冇聯絡？）冇喇！當時拍咗四年拖，大家因了解而分手。當時剛踏入社會，大家開始各有各忙。而且我當年太細個，有時會忽略對方感受。”

    MV中不乏親密鏡頭，何天嵐稱視乎導演要求，不介意獻出熒幕初吻給師兄。她賣口乖說：“師兄咁靚仔。”謝高晉笑言自己的熒幕初吻早已獻出，又指今次是他主動邀請陳靜擔任MV女角：“我同佢係拍電影《同班同學》時認識，後來大家簽埋同一間電影公司，間中都有食飯聯絡。有向佢請教拍戲，好想MV請到女神助陣。（會唔會加親熱戲？）唔會專登加戲。”