馮允謙為紅館騷拍海報
馮允謙(Jay)日前在新碟《LOVE & LOSS》發佈會上透露“三月紅館見”,即掀起粉絲騷動,就連他在加拿大的家人都準備機票返港捧場。昨天演唱會海報終於曝光,海報色彩繽紛,Jay吹着吹波糖,頸上掛着POP字樣的頸鏈,玩味十足。
拍攝時,雖然他被一張大紙板“困”住,紙板有三個窿,他只可以露出頭部和一雙手,動彈不得,但心情大好,風騷擺甫士表情多多。期間因為雙手剛好觸不到頭部,鼻痕痕時嗌救命,非常搞笑。
終於如願踏上紅館開個唱,Jay拍海報時全程笑到見牙唔見眼。他說:“好開心,等咗十一年,我終於喺紅館開演唱會啦!點解演唱會名叫‘JAYPOP’?其實我寫咗咁多Pop songs畀自己同埋人哋,我都好想喺自己嘅演唱會,分享我Jay嘅心中嘅Pop songs。今次演唱會海報用咗好多顏色,透過唔同色彩,畀大家見到不同嘅我,希望大家同我一樣咁期待呢個演唱會。”
留言