煇哥到處遇貴人

    煇嫂緊緊握着煇哥的手，直到離去，仍依依不捨。不是“糟糠之妻不可忘”，他們曾是窮夫妻……煇哥留學期間，留港老婆靠朋友的朋友代支家用；冇錢夫妻並不哀……

    夜總會彈鋼琴，兼三份職，才能養活一頭家：幫人練歌、替歌星抄譜，也做臨記；何來有錢留學，還要養家呢！“眞係傷透腦筋”，煇哥早年受訪，大談坎坷：“好彩我家姐顧媚識得方逸華小姐、方靜音小姐，好傾得埋，睇吓有乜辦法幫助我完成志願。但係，成年咁長時間幫我養家噃！卲老闆一口就答應，佢資助我去美國的旅費。此外，每月支三百元畀我屋企作家用，直到我讀完書返來。”

    旅費用來搭飛機的，顧嘉煇為省點錢而改搭船，坐了十八天船才到達三藩市，再搭三日兩夜火車到波士頓。報到爵士音樂學校的時候，袋內只剩一百美元，怎能食住一年？

    放低行李，即找學院校長（當年夜總會的洋遊客），他親自帶顧嘉煇加入工會，申請工作證 。得到鋼琴老師介紹到酒店工作，以為在咖啡座彈鋼琴，去到才知做傳菜員，由晩飯開始上班做到深夜十二點。他兩天後唔做，不因為怕辛苦，而是覺得失望，竟然與音樂無關嘅……世界事有冇盡如人意呢？有！他重遇在香港時已認識的菲律賓同學，都是苦學生，一齊搵嘢做。

    有班菲律賓音樂人，生活在波士頓好耐，識不少門路，介紹兩個苦學生到餐廳、酒店做特約節目，一個月三、四次，每人就有百多美元收入，夠晒生活費了。煇哥與菲律賓同學一起住，百元開支已夠了，生活安定下來……他得到的奬學金只是一年，後來，他還多讀一年，完成了兩年學業才返港——

    返港第一份工作，入卲氏還債！顧嘉煇一定要還卲老闆代支的一年養家費；請公司每月在他的薪酬內扣除若干款項。圈內言之鑿鑿，傳為美談的，卲老闆不要顧嘉煇還錢，薪金照支，以前資助留學的費用一筆勾銷。顧嘉煇説：“卲老闆是我事業上第一個恩人。”而香港樂壇第一位天才大師，從此收歸老闆旗下，成了卲氏、無線御用音樂之神。不過，煇哥還可以自由接外快。（煇哥天才遇雙伯樂 · 三之二）

    高  梁