TVB的實驗性湊B真人騷《爸知弊！你嚟湊吖！》請來「食腦爸爸」林盛斌、「喊包爸爸」林子善、「暖男爸爸」陳展鵬及吳若希的澳門老公Alex帶埋囝囝囡囡上鏡。四位爸爸將在「無劇本」、「無預警」及「無得傾」的「三無」情況下「突發性」獨力湊小朋友，不自覺地誤墮全家親子拍攝騙局陷阱，場面搞笑。

明晚（31日）首集嘉賓為林盛斌（阿Bob）、太太黃乙頤（Pearl）及細仔Jaye Jaye；阿Pearl認為阿Bob最需要改善的地方是脾氣，她說：「佢覺得仔要有承擔啲，所以對個仔特別惡，連個仔本書擺得唔啱位，佢都可能會好忟憎。」阿Bob要獨自應付Jaye Jaye衍生的各種難題，又要應付連串節目組安排的「不可能任務」，當中最讓阿Bob頭痕的，是要教曉Jaye Jaye「3的乘數表」，阿Bob一接戰書即忍不住嘆謂：「今次死火，有排搞！」結果一如所料，阿仔一聽到乘數表即瘋狂逃亡，阿Bob尚未從絕望中回魂便要用盡各種方法制服兼勸服囝囝，除了要箍到實防止進一步逃亡，還化身「正能量大使」為囝囝打氣，完全是體力及腦力大考驗，慘情程度令路過的主持黎諾懿亦忍唔住笑。

阿Bob還要應製作組要求與太太上演「爭女大戰」，即時實測大女及二女會先回覆阿爸定阿媽短訊，結果阿Bob即使在第二round出茅招，亦未能扭轉劣勢、連續兩round被老婆KO，不甘心的阿Bob一度搶電話與二女講數，卻遭阿女爆出一句：「你講句真話吖！」與囝囝玩遊戲時阿Bob再度老貓燒鬚，竟然搞錯阿仔意思以致痛失分數，連環失威的阿Bob，馬上向阿仔道歉，豈料換來阿仔「人細鬼大」安慰：「唔緊要啦，你搵咁多錢返屋企，你都係我爸爸！」隨即笑爆全場。

其實Jaye Jaye確是盡得阿Bob真傳，一出場即大顯身手的他，全程表情多多兼相當討喜，轉數及求生意欲更是超乎想象。話說兩位主持突然拋出難題：「你鍾意爸爸多啲定媽媽多啲？」，Jaye Jaye聽完先秒速投向媽媽懷抱，但當發見到爸爸勁失落後，即扮迷茫企圖蒙混過去：「你（爸爸）會畀我多啲時間睇電視，媽咪又成日都攬我，我揀唔到呀！」此時爸爸媽媽分別以不同方式「拉票」，聽到Jaye Jaye托晒腮兼「左右為難」。

真人騷主持陳敏之及黎諾懿請來林盛斌（阿Bob）、太太黃乙頤（Pearl）及細仔Jaye Jaye做首集嘉賓。（相關機構圖片）

阿Bob細仔Jaye Jaye被問到世紀大難題，即時扁起嘴仔。（相關機構圖片）

Jaye Jaye答鍾意媽媽多啲，阿Bob即時變得失落。（相關機構圖片）

阿Bob 獨力湊唔掂細仔Jaye Jaye，主持黎諾懿路過更恥笑他。（相關機構圖片）

（右起）阿Bob與太太 Pearl 同時發短訊給大女，測試她會先回覆誰。（相關機構圖片）

大女即時先回覆媽咪，細仔看到爸爸的沮喪樣亦忍唔住偷笑。（相關機構圖片）

阿Bob 夫婦再以相同手法測試二女，結果同樣是媽咪取勝。（相關機構圖片）