由黎諾懿擔任主持的TVB全新旅遊節目《隨懿深度行》於今晚（26日）首播，頭炮邀請好友李佳芯（Ali）到訪馬來西亞做嘉賓，令大家意外發現Ali的靚靚畫功。原來Ali除了是氣質女神，還學過水墨畫，相當有藝術才華。

諾懿找來Ali擔任嘉賓並到訪怡保，由於Ali向來走「療愈」及「心靈」系女神路線，諾懿專誠帶她探索怡保打卡秘境，包括「怡保鏡湖」及民宿「檳榔故鄉休閒贊」等，齊齊感受大自然，其間學過水墨畫的Ali 還會大曬靚靚畫功。探索「怡保鏡湖」期間，Ali跟隨諾懿坐舢舨穿過120米長的隧道後，壯麗的大自然美景即映入眼簾；二人並嘗試尋找被列為「瀕危物種」的鬱烏葉猴。

另外兩人還到訪了怡保旅遊熱點「二奶巷」，全集問題多多的Ali在「二奶巷」中再度「好奇寶寶」上身：「點解唔係大奶巷係二奶巷？」諾懿即指二奶巷是因城中一名有錢人買了一整條街送給二奶而得名，Ali聞言搞笑追問：「咁大奶有啲咩呀？」相當精靈。除了觀光Ali還「大開食戒」品嚐地道甜品「雨滴蛋糕」、「彩虹啫喱球」、烤牛油咖央多士、「馬來西亞名物」怡保白咖啡等；Ali學習拉茶期間更有意無意展現「老鼠仔」，並向諾懿搞笑示威：「我有出錢、出汗同出力㗎！」平時睇落纖瘦的Ali忽然大曬靚肌，可謂「唔聲唔聲，嚇你一驚」。雖然「姿勢」十足，但Ali實際卻「倒瀉籮蟹」，為諾懿獻出「處女拉茶」的她最終搞到「一褲都係」，更慘遭諾懿「食花生」，場面惹笑。

其實Ali與諾懿絕對默契十足，二人除了不時互窒放笑彈，Ali更經常於諾懿拍攝期間在背後搞搞震吸引視線，相當佻皮。與Ali極為熟稔的黎諾懿又會無意間踢爆老友因為一個原因經常蕩失路。節目每集均會以諾懿或是嘉賓身份、模擬兩人在IG打卡交代行程及心情，以增加互動及生活感。 （編輯：游子欣）

（左起）Ali 同諾懿默契十足，成日一唱一和。（相關機構圖片）

Ali 拉茶好似好有氣勢，可惜得個樣。（相關機構圖片）

Ali 拉茶拉到褲都濕埋。（相關機構圖片）

Ali 賣慘樣真係可愛到犯晒規。（相關機構圖片）

諾懿帶 Ali 遊二奶巷。（相關機構圖片）

Ali 食烤牛油咖央多士時表情多多。（相關機構圖片）

諾懿拍攝時，Ali 走到他後面整古做怪搶鏡。（相關機構圖片）

Ali 為《隨懿深度行》打頭陣。（相關機構圖片）

（左起）Ali 與諾懿坐舢舨穿過 120 米長的隧道探索「怡保鏡湖」。（相關機構圖片）

原來 Ali 的畫功都佢個人一樣咁靚。（相關機構圖片）

節目中兩人會在 IG 打卡交代行程及心情。（相關機構圖片）