周國豐閱盡巨星臉色

    最難侍候的歌壇巨星：梅艷芳、黎明……《中年好聲音》導師周國豐都曾與他們周旋；今天面對大群潛龍臥虎，氣定神閒，一一點穴，並非偶然。

    香港電台三十多年生涯，被當場考起的，黎明！金句王由來，這樣的——節目中，周國豐跟客席主持陳淑蘭追問Leon：有名有利，仍想追求甚麼？他虛無縹渺回答：“想要月球上一根草。”頓時鴉雀無聲，蘭子頂唔順，“雖然愛你，但唔知你講乜。”翌日，呢個訪問變成娛樂版頭條新聞。

    電台元老說“哥哥”——張國榮捧金針奬，香港電台慶功宴後，再有私人慶功宴。哥哥熱情頻頻給我斟紅酒。之前，我在港台慶功宴飲太多啤酒，溝酒後出事。我坐“哥哥”身邊，突然喉嚨湧上一道熱氣，好似開水喉咁狂嘔，好彩及時扭轉身，朦朧中聽到王菲大笑聲。“哥哥”不但沒有藐爆我，更叮囑朋友幫我抹乾淨；第二朝還來電慰問。自此留下陰影，唔敢再溝酒飲。多得哥哥。

    閱盡巨星臉色，資深DJ，竟遭梅艷芳當面拍枱大駡。周國豐那時，已“官”至助理廣播處長，“十大中文金曲金針奬”，我負責歌星統籌。由於上司多次要求更改表演節目，仲要改到飛起。走入Band房，向梅姐提出改乜改物……事隔二十六年，歷歷如昨。梅姐當時好，惡到癲，嬲到震，拍枱指住我狂鬧：“轉來轉去，我唔要個奬啦。”第一次見到梅姐咁惡，驚到震，手足無措。幸好倫永亮打圓場，佢打眼色示意我先離場，最後各讓一步成事：彩排期間，我盡量避開，不敢再惹阿梅。完場後，梅艷芳主動跟我道歉，叫我唔好嬲佢。

    拍枱大駡“助理廣播處長”，第一次致歉，皆因節目編排改來改去，“罪在台方”，圓滿收場。原來還有第二次道歉。有次直播節目甩底，節目完結後三個小時阿梅才出現，認錯：“唔知醒！”為人坦率，“我好尊重佢！”

    最近，姜濤唱《蒙着嘴說愛你》甩嘴，網民狠批“咪嘴”……粉絲七嘴八舌，莫衷一是。

    《中年》導師，原來，也是姜濤顧問的周國豐，有話要講：“說姜濤咪嘴，唔公平！因為，演出當日的早上八點幾，他已現身彩排，如果要咪嘴唱歌，何必咁早來彩排。應該係讚，對演出好認眞。”三十多年DJ歷練，當年的助理廣播處長，功力猶在，舉重若輕！

    高梁