劉松仁談生病的價值

    “我哋老啦，跟住病，病會死，呢個過程唔可以或缺，係一定。”三年蟄伏，傳說中風的戲神劉松仁受訪，“我告訴自己，活到人生任何一個階段都一定要精彩。病！要精彩！死，要瀟灑！毋須多牽掛……。”

    傳仁哥有病——“人家‘啄’住你有病，‘劉松仁而家好悽凉’，但係，佢哋忘記咗，之前，你係拍咗五十年戲；點解，我要畀你講我病咗？你唔講我拍過嘅戲？個個都會病，我希望人哋講我病咗係如何面對，呢樣嘢先值錢。困難個個都有，你如何面對才最重要。”

    親自策劃、執導、監製的音樂劇《利瑪竇》，今年四月第三度重演……。加入數十人管弦大樂隊及一百位中學生參與演出。早有此設計，冇錢未能成事。如今機緣巧合，希望觀眾更加投入，享受整齣戲的精神。松哥戲中演甚麼角色？“籌拍《利瑪竇》那些年，我已經冇拍戲，個個問我演乜嘢，原來，我對演戲一啲慾望都冇，仲好驚口添。我係好內歛、好怕醜、怕露面，又唔鍾意張揚的人……。”劉松仁自言，“我唔會再拍戲了，如果再拍，就唔矜貴。”

    為何執導傳奇人物《利瑪竇》音樂劇？“好奇怪……”松哥表示，與恩神父深交多年，對方從未邀他任何演出。“教會工作，我甚少接觸，好怕Hard-Sell。”十多年前，恩神父邀松哥演舞台劇《流芳濟世》，那時剛巧四齣戲在身，無暇演出。不料，四部戲同時宣佈延後，冇得推，開始第一次合作。“五年後，他叫我做導演，我乜都唔識，好彩有許多人幫我，第一個我搵王梓軒……。”

    人生旅途不停地行，只要肯行，就會有不同遭遇，總要一路走下去的……。相反，被松哥點名做男主角的梓軒感到“壓力山大”。“松哥叫我演利瑪竇，我好耐冇答應，我何德何能。後來，都係行咗先，此劇長期醞釀，大家合力去做，而你自己覺得唔適合，像嘥咗人哋嘅時間和精神。遇到問題，不應視之為障礙，而是練習；有問題，去解決，才令你進步……。”

    梓軒稱松哥“恩師”，兩人相處如兄弟。“我唔理呀，我下半生交咗畀佢”，梓軒差點掉到地上，透露一個秘密：《利瑪竇》也許加一個角色“利老竇”，角色誰屬……？

    高  梁