波姐康城世界影展封后

    馮素波演《垃圾》，講虐老的悽酸短片，揚威法國康城世界影展。波姐八十歲寶刀猶健，獲得不只一個大奬，而係三個——最佳銀髮影片、最佳人道主義影片、最佳女演員（短片），世界級影后了。“對於我這個老太婆來説，眞的意義非凡，心裏充滿感激……”這位香港老甘草，兩年前被無線離棄——

    離開合作超過三十年的電視台，“並無依依不捨，但好留戀這張員工證。”波姐説：“兩年前改一年一騷，好多同事走咗。冇工作不用入廠，與高層冇乜關係，也無感情；保留這張工作證，可以返去食Tea，探朋友。”

    藝員科電話通知“分手”……“有需要時，你會唔會返來拍戲？會唔會嬲我哋？”“我唔會駡TVB，做咗幾十年啦。”波姐爽快回應，“唔好以為TVB係長期飯票，佢冇責任養你一世。即使你養大個仔，都唔會養到你死啦。就算佢話得，我都未必肯制。可能出面有更大發展呢！正如當年王維基向我招手，游説我出去睇吓：‘儘管有把遮擋雨，但太大雨，都頂唔順會濕身。其實，你有好大價值！’唔出去，唔知自己潛力……”

    “年紀越大，劇本根本不會再為我而寫。”波姐揮揮衣袖，不帶走一片雲彩，“戲份不多，角色大可留返包薪藝員去做，畀機會佢哋跑數還騷。呢啲係佢哋做生意手法，諗通就明白。”

    “綜藝組對我發話，要開新節目給我發揮，問我有乜嘢發揮？太有趣了。”波姐忍不住反問：“我喺呢間公司三十年，入得嚟做嘢，一定有才華，唔通白支人工咩？係佢哋唔了解每個藝人，其實，TVB個個藝員都有才華，路人甲乙丙都稱職。”

    法國康城世界影展，是一個比較新的影展，二〇二〇年開始舉辦。波姐社交平台帖文：“雖然，不是你們經常聽説的那種大影展，但是我們的作品能受到關注，我還是覺得好開心好榮幸啊！”網民紛紛送上祝福，恭喜波姐獲奬，老當益肚，好戲之人，實至名歸，期待見到《垃圾》這部作品公映。

    波姐曬捧奬相上網，留言：“多謝短片裡一起合作的演員們、欣欣導演、利希愼基金、陶哲甫基金、香港理工大學的策劃團隊。”而麥婉欣導演特別感謝波姐：“去年，香港最悶熱時候，我們在街上工作了幾個通宵，辛苦了……希望影片未來能幫助到有需要的人。”

    高梁