唔好下巴輕輕
第四屆澳門特區政府新班子人選已正式公佈,之前外界有諸多猜測,亦傳出過好幾份名單,正如特首所講決定人選有難度,不過提名相當順利,中央十分信任,看來並非如外界揣測有阻滯,致使名單久久未公佈。無論如何,最後成功入閘者必然有其可取之處,擔當要職,工作關係民眾福祉,既然獲中央信任,更應加倍努力,在五年任期內刻盡己任,協助特首做好施政,帶領特區繼續向前發展,造福萬民。
五司及多個政法機關候任要員,行政長官率領下會見傳媒,稍為介紹一,大家上到台,照背台詞,寒喧幾句,未上馬,談將來,自然無咩重點!哪怕滿腹大計,都要等正式上任至講啦!唯一能說就盡快投入新環境,努力做好份工,唔熟悉有難度,熟悉就繼續做,要依法就依法,要改革就改革,實冇衰。新班子雖然大執位,但個個都好有社會或公職經驗,接棒應該無難度,能唔能夠做得更好,就要拭目以待。
咁多候任官員談到未來工作,語調較為保守,穩穩陣陣就算,或者因為所屬範疇較為敏感,還是小心駛得萬年船。較為響亮,莫過於社會文化司候任人,又話有十五年社會範疇工作經驗,又話對老百姓訴求耳熟能詳,更揚言醫療建設將走進最光輝的五年,搶盡風頭。近日脊骨受傷的十七歲男生,更戲劇性獲當局批准送外就醫,事主母親都贊當局比之前好。不論咪如筆者所想為新任司長造勢,但願唔好下巴輕輕,講過就要負責。
山草
留言