巴塞讓多“蘭”度大
昨日歐冠介紹場祖記對皇馬,今日同樣都係“西意”兩地大戰,巴塞羅那對AC米蘭,兩隊暫時都未能確保穩入十六強,所以必會積極求勝。當然,巴塞係呢組出線頂頭大熱,實力無疑在各對手之上,今仗更在自己地頭出戰,贏面的確好高,但初盤一開出就要硬讓兩球,太過視對手AC如無物。雖然AC近況不外如是,但爛船都有三斤釘,打大戰又經驗十足;就算技不如人,輸,都未必輸到一敗塗地咁醜怪。巴塞要贏到三球先有純利,真係超唔划算,幾大都捧AC,大不了輸波,最實際贏盤有錢收。
上場兩隊對陣,巴塞一如既往控制大局,控球率贏足成條街,但又有何用?足球比賽最緊要將個波擺入網,最終亦只能逼和AC。正如上場聯賽對愛斯賓奴一樣,巴塞幾乎以最強人腳出戰,可惜攻來攻去都只係一球小勝,證明對手收窄防線,巴塞真係老鼠拉龜。
AC在聯賽戰績真係差到冇朋友,教頭艾歷尼遲早玩完,可以搵定第二份工,但AC點差都好,踢歐戰始終四平八穩,至少今季歐冠依然未輸過。就算對住地上最強的巴塞,亦不致於會慘敗收場。
推介:巴塞羅那2:1
足球評述員 Ben
留言