恆大等“首”捧盃
今日唔講英超、唔講西甲及其他歐洲波,講恆大對FC首爾嘅亞冠盃終極一戰。因為中國足球有機會威返一次,可以成為亞洲之王。
唯一可惜小弟未能親身撑場,講開真係火都嚟埋,晨咁早訂飛都只係得個吉,黃牛飛更加炒到七、八千“人仔”一張,成“皮”嘢去睇場波!又點睇得起呢?唯有望住“公仔箱”為恆大打氣。
首回合恆大作客與FC首爾打成二比二平手,揸住兩個作客入球在手,今晚返到自己地頭出戰自然信心大增。計埋分組賽,恆大在主場取得五勝一和,更加攻入十六球兼零失球,球隊不但主場發揮勁到爆,數以萬計嘅“恆粉”更加聲勢浩大,吶喊助威之聲簡直可以震懾對手。當然,球員表現好與壞最重要,特別三大戰將,孔卡、穆里奇及艾傑臣,食粥食飯都要睇呢三位萬能俠。
既然可以殺到入決賽,FC首爾亦非善男信女,單計土炮球員,韓國仔確實硬橋硬馬得多,而且鬥心比中國球員強,加上丹贊奴域、艾斯古迪路及摩連拿同樣有一定質素,所以恆大絕對不能睇低對手。但點都好,都希望恆大可以登頂。
足球評述員 Ben
留言