恆大繼續努力
廣州恆大終於如願以嘗,成功勇奪亞冠盃,為中國足球爭返一口氣,不單只廣州全城雀躍,相信全國球迷亦皆大歡喜。
其實賽前真係有啲擔心,因為恆大對於今次捧盃自信心實在過大,甚至乎係“攞硬”嘅意思,所有嘉賓、大人物、歌手及慶祝活動等早已安排兼張揚,或者老闆真係胸有成竹,但所謂唔怕一萬只怕萬一,如果埋門一步脫腳的話,咁就真係超冇癮。事實上畀FC首爾追和一比一後,賽事尾段的確一額汗,小弟睇“公仔箱”都睇到相當“肉緊”,好彩最終都能夠達成心願。
有人話恆大今次亞冠之路,係用金錢鋪成,齋冠軍奬金都超過一點五億“人仔”。咁當然啦,冇咁嘅人力、物力及財力,又點會如此順風順水,能夠得到如此佳績,又試問當今世上,邊支成功頂級球會唔係用金錢打造呢?如果冇呢啲大財團、大老闆去投入資金,足球運動又點會成為世界上最受歡迎。
恆大能夠有今日成功,除咗金錢之外,千祈唔好抹煞球隊上下所有職球員嘅努力,仲有千千萬萬中國球迷。希望恆大會繼續為中國足球增光,證明今次光輝並非剎那。
足球評述員 Ben
留言