附加賽殺埋身
世界盃附加賽兩回合嘅生死戰即將展開,到底邊六國可以最後衝刺,搭到尾班機飛去巴西踢決賽周?
明晚先有兩場跨洲對決,約旦對烏拉圭、墨西哥戰新西蘭,如無意外,兩支決賽周常客烏拉圭與墨西哥應可齊齊過關,始終對手實力有限,烏、墨當踢多兩場熱身賽。歐洲區方面,戰火就激烈得多,尤其是本地“馬交友”最關心嘅葡萄牙,將與瑞典決一生死,兩隊只能活一隊,亦係C朗與伊巴兩大射手對決;無獨有偶,呢兩位國家隊陣中大佬剛在聯賽同樣大演帽子戲法,協助球會大勝對手,狀態不相伯仲,肯定擦出火花,而身為“陀地”的我,當然撑葡萄牙,話晒曾經都係“阿咪古”。
此外,法國惡鬥烏克蘭又係一場大激鬥,唔好以為法國佬贏面較大,呢班“烏軍”作戰能力絕對唔差,機動性踢法,再加上體力化緊迫,首回合要作客嘅法國要讓波的話,一定唔啱聽。
仲有兩場希臘對羅馬尼亞、冰島對克羅地亞,彼此實力唔相差得太遠,到底邊隊可以過關,大家拭目以待。
足球評述員 Ben
留言