紅魔作客“遜”唔過
今晚歐冠比賽之中,部分熱門強隊都已篤定出線,唯獨A組榜首之戰,利華古遜對曼聯邊隊輸波,隨時會陰溝裡翻船,尤其守住次席有七分嘅利華古遜,今仗只要殺退對手攞足三分,就可穩入十六強,必會借助主場之利全力求勝。
只多一分嘅曼聯仍未坐定粒六,如果今晚大吉利市輸波的話,同組薩克達又擊敗皇家蘇斯達,紅魔最後一輪就要打生死戰,所以實在輸唔起。奈何又受到傷兵困擾,兼上場聯賽作客卡迪夫城發揮毫無強勢,今仗能搶得一分已當完成任務。初盤利華古遜讓平手/半球,失去霸氣嘅曼聯受讓亦捧唔過,不妨考慮主場惡到出汁嘅利華古遜可以降魔。
“利記”今季主場有幾惡?各項賽事九次自己地頭出戰,取得八勝一和不敗。除與班霸拜仁踢成一比一外,八場勝仗共攻入廿五球,最少一場都有兩球進賬,三大攻擊手基斯寧、悉尼森及韓國小虎孫弘民絕對有料到,料可攻破曼聯“流到痹”防線。
曼聯目前陣中有唔少“病魔”,包括雲佩斯、卡域克、韋迪,菲爾鍾斯及拉菲爾等,肯定未能排出最強人腳,一句講晒,作客實在靠唔住。
推介:利華古遜2:0
足球評述員 Ben
留言