歐冠八強好睇過戲
早幾日歐冠盃經已抽籤,八強廝殺肯定場場戲肉。先講全球最多“粉絲”嘅曼聯,將會遇上衛冕嘅拜仁。紅魔今季由莫耶斯接手後,戰績大倒退,無論球隊戰意抑或球員比賽信心,明顯都陷於低潮期,撞啱如日方中嘅拜仁,紅魔整定唔好彩。
皇馬與多蒙特真係冤家路窄,上季被“蜜蜂兵”刺傷嘅皇馬此仇非報不可,首回合先踢主場誓必要重創對手。多蒙特今季戰力大走下坡,要再一次斬“馬”,睇怕都有一定困難。
“老摩”帶領嘅車路士都算抽到條好籤,對手係巴黎聖日門,可以避開西甲與德甲兩大聯賽勁旅。始終聖日門係八強中實力較弱一隊,車仔有望衝擊四強。
另一場係西甲內戰,巴塞將與馬體會爭四強一席位。牌面上巴塞應可睇高一線,不過馬體會今季大爆發,雙方近三次對戰亦未能分出勝負,巴塞絕不能掉以輕心。要預測冠軍誰屬實在言之過早,但小弟睇好拜仁、皇馬、車路士及巴塞將係四強之選。
足球評述員 Ben
留言