雨天運動有風險
小心畀雷劈!做咗虧心事嘅人留意此話外,行雷閃電落雨天依舊運動人士亦要留意,皆因雷公無眼,一個唔留神,分分鐘畀雷劈成燒豬,命仔休矣。
賈某所言非虛,因為奧地利日前一場低組別聯賽,便上演一幕怵目驚心的球員集體被劈嚴重意外。該場賽事開始前,因為狂風暴雨無改善,球證決定宣佈暫停,正當球員準備搵瓦遮頭避雨之際,雷電突然橫空襲來,球場內八名球員當場受傷。其中一隊的兩名球員更傷勢嚴重,需要由球員同工作人員即場進行二十分鐘搶救,再由直升機送往醫院,幸經治療後兩人並無生命危險,目前情況穩定,總算不幸中之大幸。
講返澳門,類似事件絕少聽聞,但未知是否這個原因,居民在惡劣天氣下、甚至風球高掛日子依然從事戶外運動(尤其跑步)者亦為數不少,還記得早兩個星期雨落個不停,賈某揸車經過海洋花園、黑沙環海濱公園等地,仍見有跑友無懼風雨,照跑如儀。撇除被雷劈中這種概率極低的意外,在惡劣天氣下戶外運動,肯定的是變成落湯雞易着涼生病,同時天雨路滑,一個唔留神隨時跣腳“拗柴”。做運動為健康,若然好事變壞事,着實不值。賈某都係一名跑友,深明落雨天冇得運動的鬱悶,的確心癢難耐,但停一停、忍一忍,總好過事後生病或受傷,更長時間冇得運動,更加得不償失。
賈大廚
留言