皇馬復仇誓殺巴塞
西班牙盃今晚上演決戰,兩大死對頭巴塞羅那激鬥皇家馬德里,連番受到打擊嘅巴塞能否及時反彈,今季三殺皇馬就要睇球員作戰心態,始終球隊近期發揮的確踢得比較低迷,整體狀態令人質疑。
至於有食糊人物C朗缺陣嘅皇馬,今戰爭勝鬥心肯定強過巴塞多多聲,一來為報聯賽雙殺之仇,二來誓向三冠王衝擊,趁佢病攞佢命,皇馬料可怒殺落水狗的巴塞。初盤巴塞羅那讓平手/半球,毋須多考慮,一於捧皇馬食“塞”。
決賽一場過兼在中立場交手,兩隊實力又屬半斤八両,根本冇高低之分,勝負就要睇雙方人腳是否完整,戰意及臨場埋門一腳把握。雙方都有唔少主力缺陣,巴塞重災區在於防線,門將華迪斯、中路守將比基、佩奴爾、巴拉特及艾迪安奴等,防守球員所剩無幾。
皇馬傷兵亦唔少,當然最大影響係C朗唔踢得,但陣容方面仍較為完整,尤其前線攻擊力,巴利、賓森馬及迪馬利亞狀態十足,對比巴塞更具威脅性,始終美斯呢兩場踢得比較低沉,尼馬與柏度亦只屬一般,相信皇馬的攻擊力會更加直接攞命。推介:皇家馬德里3:1
足球評述員 Ben
留言