馬體會強勢難擋
西甲雄獅馬德里體育會今季異軍突起,不但在歐冠盃過關斬將殺入四強,目前在聯賽更壓倒皇馬與巴塞居榜首,奪標形勢大好,有機會打破兩大豪門近年壟斷西甲局面。只要贏多四場比賽,就算最後一戰煞科戰不敵巴塞,馬體會依然可以成爲今季王者。
今晚第一關先過實力明顯較弱嘅艾爾切,主場出擊兼勢如破竹,如無意外,呢三分應該“依絲執”,只係贏多贏少問題。排第十五位嘅艾爾切暫時只多降班線球隊四分,仍要為護級掙扎,奈何球隊前線火力不足,爭勝能力有限。今仗更對住如日方中、搶分搶到“嘭嘭聲”嘅馬體會,艾爾切實在凶多吉少。初盤馬德里體育會硬讓球半,近期超強氣勢,唔通仲推介艾爾切畀大家咩!
馬體會近十場各項賽事“贏九和一”,只係在歐冠盃八強作客被巴塞逼和,確有遇神殺神感覺。就算今仗有殺手哥斯達缺陣,但仍有大衛維拉與盧比斯,足以摧毀對手防線。
唔係話艾爾切毫無爆冷機會,不過卅三場聯賽只得廿幾球進賬,軟弱無力嘅鋒線又何德何能攻破防守力最強嘅馬體會。
推介:馬德里體育會3:0
足球評述員 Ben
留言