英超煞科前奏
歐洲各大聯賽呢兩日暫停戰火,要等到周六繼續開戰。英超就在星期日晚煞科,十場激鬥同時展開,所以今、明兩日又同大家吹吓水。
英超既然周日上演大結局,今日就先講英超。最受球迷關注當然係爭標叫糊嘅曼城,雖然執筆之時未知曼城對維拉踢成點,但主場出戰,贏唔到應該都冇得輸,所以煞科戰對住韋斯咸,係“藍月亮”真正王者一戰。以韋斯咸實力,要阻曼城登基應該係幾難嘅事,首循環在主場都輸三球,上季作客更慘吞六蛋,可想而知雙方人腳實力差幾遠。如無意外,曼城當晚可以大開派對。
功虧一簣嘅利物浦的確喊都無謂,鬼叫自己“臨尾香”,唯有下季再接再厲,爭取一嘗英超冠軍夢。但話分兩頭,羅渣士雖然埋門一腳失蹄,但能夠將紅軍帶返Big4行列,已經對“紅粉”有交代,更騎住車路士、阿仙奴及曼聯,實在唔容易。
最令人失望嘅曼聯今季係最失敗一季,連下季歐冠都踢唔到認真超失禮,希望下季紅魔可以重振聲威,再與列強爭霸。
足球評述員 Ben
留言